Mala nova... para os usuarios de Mac que producen os seus podcastes co Audacity, posto que seica faltan voluntarios que axuden ao lanzamento da versión 1.3.4 desta plataforma. Con todo parece que o S.O.S. enviado no foro do editor de audio callou e xa se presentaron algúns voluntarios. Agardemos que a cousa se retome.

+ info:
http://audacityteam.org/
http://audacityteam.org/forum/viewtopic.p...

Xa vai para un bo feixe de semanas, o amigo Calros nos comentaba que o Morrazo, noutrora capital do heavy nos oitenta, estaba a se converter agora en capital da electrónica na Galiza, e nos remitía a un novo netlabel especializado nese tipo de música, Teorema. Até agora non teñen unha web propia e traballan polo myspace, mais así e todo teñen xa lanzandos baixo licenzas creative commons, media ducia de EPs carregados de electrónica, techno e house; somándose deste xeito ao selo especializado tamén neste xénero musical Parafuso, que leva xa un ano lanzando novas propostas. No seu myspace din que pertencen ao Colectivo Feelthetrip, unha especie de asociación de dj galegos, principalmente cangueses, onde tamén podes descargar, baixo a mesma licenza, as súas producións.
E esta mañá, de novo Calros, achégame un correo que lle remitiran desde Teorema, anunciando o nacemento de Tres Catorce Netlabel, unha división do selo, enfocada cara o baile mental, e o lanzamento da súa primeira referencia: un compilatorio chamado Piedra Angular, cheo de sons ambient, jungle, post rock e mesmo dub. Neste disco recollen producións de Astroboyz, Leche, Movhi, One, Malt.Tabulated Sounds, A.I, SR Duck, Dark Squad, Danjelli, Nai-Ox, Misqulater, LUME Produccions, Jacobo Prieto, e Dedxound.
E pesquisando por estes sitios topamos tamén estoutros, que poden ser de interese para os siareiros destes sons de club e baile: Offaudio.com, portal e netlabel, sobre música techno en España e Flyers de Luxe, web de cultura electrónica viguesa.

Queremos facernos eco da interesante proposta de ACoruñaSon.
Trátase dun certame de creación de canción popular organizado polas Concellarías de Cultura e de Mocidade do Concello da Coruña, en colaboración coa Deputación da Coruña e co apoio da Radio Galega, Gadisa e Ámbito Cultural de El Corte Inglés. Este Certame ten como obxectivo fomentar, descubrir e promocionar novos autores e autoras de canción popular en galego.
Os autores/-as participantes no certame deberán subir os vídeos ou MP3 das súas cancións orixinais á web http://acorunason.eu entre o 16 de xaneiro e o 5 de marzo de 2007. Todos os usuarios/-as rexistrados na web e os oíntes de “Aberto por Reformas” da Radio Galega terán a oportunidade de votar polas súas cancións favoritas. Destas votacións sairán un total de 30 seleccionadas, entre as que o director técnico do Certame, Santiago Auserón, escollerá os 10 autores premiados. [...] O anuncio dos 10 autores/-as gañadores darase a coñecer publicamente o día 10 de marzo de 2007.
Os dez autores/-as seleccionados terán como premio a asistencia a un obradoiro de canción popular dunha semana de duración impartido por Santiago Auserón, primeira figura da creación, a interpretación e o estudo da música popular peninsular, onde traballarán as súas propias composicións. Así mesmo as Concellarías de Cultura e de Mocidade asumirán a gravación e edición dun disco colectivo coas composicións dos dez autores premiados.
[...]
Unha vez rematado o Obradoiro, a web http://acorunason.eu manterase con vocación de continuidade para que os autores/-as de canción popular en galego poidan continuar a subir e dar a coñecer as súas composicións, de modo que cumpra a función de plataforma de promoción e difusión da música popular en galego a través da Rede.
+ info: http://acorunason.eu

A el dálle aquel que o digamos, pero o noso compañeiro Sak, pioneiro no podcasting en galego co seu magnífico e, mágoa, desaparecido e-music (a ver se un día fai algo para subilo á rede outra vez), pasou de ter un falangullo a ser o flamante presentador e director de Radio Oceánica, en Radio Galega Música, recollendo o testemuño de Noel Feáns, anterior director do programa.
Sak comenzou con isto aló polo ano 2002, na Cuac FM; tempo despois cando, no 2004, buscaba o xeito de facer radio en liña na internet, deu co tema do podcasting, e aló que foi convencido de que o sistema tiña futuro. Nun principio, creaba os rss código en man, o valente; e foi así que o seu e-music, vía podcast, comezou medrar en popularide entre os internautas galegos. O seu bo facer e a súa voz, persoal e cálida, facianos crer, e desexar a moitos, que o seu sitio estaba nunha emisora de radio grande, e eis que agora o temos na Radio Galega. E ben cheos e orgullosos que estamos!
E como a cabra tira ao monte, vai retomar a publicación de Radio Oceánica en formato podcast, que estaba parada desde o mes de xullo pasado, o cal nos vén ben aos despistados que esquencemos que todos os domingos temos cita con el a iso das 22:00 h.
E ademais é bo rapaz!

O lugués Isídrez converteuse no grupo revelación deste ano do portal Promocióname, un sitio que naceu para promocionar, de balde, a artistas e grupos de música que queiran ter un espazo virtual para chegar ao grande público; e isto baixo licenzas Creative Commons. Isídrez gañou cun 30% dos votos a El Chapa (19%) e a Samueliko de las Praderas (17%). Isídrez anda a gravar novos temas, cantados en galego e en castelán, coa colaboración de Miguel Costas, ex-vocalista e guitarrista Siniestro Total, de Aerolíneas Federales e de Los Feliz.
+ info:
http://elprogreso.galiciae.com/nova/4739....
http://www.manerasdevivir.com/noticias/24... (castelán)
http://elprogreso.galiciae.com/nova/4739....