Aquí imos tentar explicar de xeito sinxelo o que precisas para gravar o teu podcast. Non é moito: un micrófono, un computador, e un programa de gravación de son. Podes facelo máis profesional, cunha mesa de mesturas e tal, pero non é imprescindíbel.

O micrófono

O micrófono, como xa todos saberedes, recolle o son. Hainos de distintos tipos, calidades e prezos, mas para comezar non é necesario que gastes moitos cartos, nin que sexa un micrófono de calidade profesional, entre outras cousas porque aí xa che faría falla unha mesa e o custe incharía bastante. Con todo, se tes interese, a casa Behringer, por exemplo, sacou un par de paquetes especiais para o podcasting, con micrófono, mesa e auriculares, a prezos non moi esaxerados.
Sendo prácticos, cun sinxelo micrófono ou un headset (auriculares con micro acoplado) que poidas conectar ao computador chega ben. Nós, mesmo temos gravado coa opción de gravar voz do noso reprodutor mp3, que tamén lle pode dar un aquel de cousa en vivo, ou non?.

O Computador

Ben, do computador, pouco diremos, apenas que teña tarxeta de son e un procesador canto máis rapidiño mellor, e que non ande escaso de memoria RAM; máis que todo porque o traballar con son tira bastante dos recursos, e aínda tira máis se vas facer un videocast.

Programas de gravación

Tamén hai unha chea deles, profesionais, de pago, caros, baratos, sinxelos... Nas Novas temos falado dalgúns, pero para o tema do podcasting, que é o que nos interesa, imos, de momento, centrarnos en dous programas:

Audacity

É un editor de son multiplataforma (Linux/Unix, Mac OS X, Windows) de código aberto e de balde. Moi sinxelo de uso, que sirve non só para gravar a voz senón tamén para editar enteiro o teu falangullo. Podes crear varias pistas onde meter os cortes de son (voz, música, cortinas...) para facer as mesturas, e ferramentas básicas e efectos para facer algo con xeito sen necesidade de saber moito de edición. Podes descargalo aquí, e tamén tes manuais básicos en castelán e português do Brasil.

GarageBand

Vén de serie co paquete, ou suite, iLive dos Mac, e o certo é, que para gravar podcasts e non só, é unha chulada. Tes unhas pistas para voz e outras para música e para jingles, de xeito que colocadas unhas enriba doutras, por exemplo, cando detecta que comeza a voz, baixa automaticamente o volume da música. Tamén podes engadir distintas imaxes para que aparezan como portada do podcast, mesmo podes pór varias en distintas partes do episodio e crear capítulos. Aquí tedes un tutorial en video (en inglés) de como traballa.
Como non todos os días son de festa, ten de malo que só é para Mac e, aínda que vén incluído no software do computador, para facer actualizacións a versións novas hai que pagar.

Unha vez tes mesturadas todas as pistas tes que exportar o arquivo enteiro coma mp3 ou ogg. Aínda que din que a compresión en ogg é de máis calidade, e é de código aberto, o certo é que non todos os reprodutores o poden reproducir, por tanto, case que recomendamos a compresión en mp3, preferentemente a un bitrate de 128 Kb para manter unha calidade xeitosa (máis pode facer o arquivo moi pesado se o episodio é longo, e menos pode facer perder bastante calidade no son) e a unha frecuencia (mellor gravar xa nela) múltipla de 22.050 Hz, o ideal sería a 44.100 Hz, para evitar que nos reprodutores saian as voces pitufantes.
Exportado o arquivo de son, só fica subilo á rede. Nos principios do podcasting había que crear o rss (preciso para a sindicación) a man ou con algunha aplicación, pero hoxe en día non é preciso, xa que, ben o subas a un sitio de hospedaxe específico de podcastes, ou ben empregues algún CMS, este xérase automaticamente. Tes información sobre sitios de hospedaxe (hainos de balde, ou non moi caros) aquí, e sobre CMSes aquí.

Os CMS, son sistemas de xestión de contidos que sirven para publicar na rede, e existen algúns específicos para a publicación de podcastes. Con todo, son para usuarios algo máis avanzados, porque hai que fochicar un pouco por dentro para que traballen como compre. Ademais, precisas unha hospedaxe propia que soporte cando menos PHP para que traballe o CMS, capacidade de almacenamento e uso de ancho de banda abondo para poder co fluxo dos arquivos de son que vas subir; isto fai que este sistema de publicación resulte, de primeiras, máis custoso economicamente por causa da contratación destes servizos.
Eis unha listaxe dos máis coñecidos:

Loudblog

É case seguro o máis empregado e está pensado e deseñado para o podcasting.

Podcast Generator

Desenvolvido polo italiano Alberto Betella (saxofonista de Verdecane e case un amigo) ao abeiro da Universidade de Bérgamo, moi lixeiro e sinxelo. Estamos traballando na tradución ao galego.

Podcast Suite de Joomla

Extensión para podcasting do popular CMS de código aberto.

PodPress

Extensión para podcasting do WordPress, outro dos CMS máis empregados na rede para bloguear; aínda que non é preciso ter hospedaxe propia se, por exemplo, tes blogue en Blogaliza.org, si precisarías subir a algún sitio os arquivos de son.

Os programas de subscrición (ou podcatchers) son aplicacións, que che permiten agregar ou subscribirte aos feeds dos teus podcastes favoritos. Descargan automáticamente os episodios no teu computador, e así podes escoitalos cando queiras e as veces que queiras. De feito, isto é o cerne do podcasting.
Estes programas recoñecen o rss dos falangullos, e sempre que se actualizan descargan o arquivo de audio á carpeta que ti marques para iso no teu computador. Unha vez os tes descargados xa podes escoitalos, ben no propio computador ou ben en calquera reprodutor de mp3 portátil que teñas.
Hai unha chea deles, pero nós imos darche os nomes dos máis coñecidos e fáciles de usar:

iTunes

É, posibelmente, o máis empregado no mundo e o que máis está axudando a espallar o podcasting. É de Apple, e sincronízase co popular iPod, permite tamén subscribirse a podcasts desde a iTunes Store. O certo é que o iTunes é un reprodutor de audio que ten acoplada a función de poder sindicarte a falangullos. Ten ademais unha cousa moi útil, e é que destaca os episodios que aínda están sen escoitar dos que xa si, de xeito que sabes máis fácil cales se actualizaron e cales non.
En contra: É moi pesado, e non ten versión para Linux.

Juice ou iPodder

Libre, de balde e multiplataforma (GNU/Linux, Mac e Windows) baixo licencia GPL. É moi lixeiro e bastante configurábel, por contra depende dun reprodutor para poder escoitar os podcastes no computador, aínda así, nas Preferencias, pode asociarse ao reprodutor que teñas instalado para que ao abrir un episodio se faga nese reprodutor. Na súa versión de Windows é accesíbel para cegos e impedidos visuais.
En contra: Leva preto de dous anos sen actualizarse e parece que o proxecto está abandonado, con todo é unha moi boa opción.

Winamp

O popular reprodutor de audio incorporou nas últimas versións un agregador de podcastes bastante xeitoso, co cal se xa o tes instalado no teu computador pode ser unha boa opción para escoitar e subscribirte aos teus falangullos favoritos.
En contra: Só serve para usuarios de Windows, e sendo muito máis lixeiro ca o iTunes, tamén é algo pesado por todas as opcións que ten como potente reprodutor multimedia.

Doppler

É moi moi lixeiro (2,41 Mb.) e tamén moi configurábel, ten unha versión DopplerMobile en beta, e leva encastrado o reprodutor para poder escoitar os podcastes. Recentemente abriron o código para que a comunidade lles bote unha man para desenvolver e mellorar o proxecto. Se vos interesa colaborar podedes visitar este sitio.
En contra: Só hai versión para Windows.

Amarok

É un reprodutor de audio para Unix ou derivados, como Linux, que incorpora sindicación para podcastes, unha outra boa opción para os usuarios destes sistemas operativos.
En contra: Só hai versión para Unix e derivados.

Podnova

Outro interesante programa desenvolvido por xente que traballou antes no Juice. É tamén multiplataforma, e ten a particularidade de que está basicamente deseñado para traballar en liña, isto é, non precisas instalalo no teu computador. Funciona un pouco como as redes sociais, abres unha conta de balde e vas metendo aí os feeds dos teus falangullos favoritos (importa OPMLs), podes facelos visíbeis a todo o mundo ou só aos contactos e podes etiquetar e valorar os episodios. Ten de bo que podes ter acceso aos teus podcastes dende calquera computador e calquera sitio. Conta tamén cunha aplicación para descargar no teu escritorio que sincroniza coa túa conta.
En contra: Só nos consta versión en inglés, e a aplicación do escritorio é algo liosa porque apenas ten catro botóns e para configuralo reenvíate á web de Podnova.

Tamén poden ser boas ferramentas os agregadores de feeds en liña, como Bloglines ou Google Reader, porén, se ningún destes que che mostramos che enche o ollo, topamos pola rede este sitio (aquí) cun bo feixe deles ligados.

Eís unha breve listaxe dalgúns sitios onde podes subir e crear o teu falangullo de xeito sinxelo e despreocupándote de ter que crear os rss.

de balde:

WordPress.com, desque decidiu que as contas dispoñan, de balde, de até 3 Gb de espazo, combinado coa súa extensión PodPress, é unha das mellores opcións que se ofertan agora mesmo.

podango.com, fundada no 2006 como directorio, agora ofrece servizo de hospedaxe de balde, e disque mesmo pagan por telo con eles metendo pequenos inseridos publicitarios, dos que che darían unha parte dos beneficios (falan dun 50%).

PodServe, aínda en fase alfa, pero parece que non pon límites de hospedaxe.

podbean.com, dá até 100 Mb de balde, e de pago dende 1 Gb a 1,99$ (1,47€)/mes até ilimitado por pouco máis de 12,00€/mes.

clickcaster.com, ten versión de balde (até 125 Mb) e de pago, está en beta.

blip.tv, enfocado para o videocasting, tamén sirve para só audio. Aparentemente non ten límite de hospedaxe, non insire publicidade, e permite publicar automáticamente o episodio no teu blog e en redes sociais. Consideramos que esta é unha das mellores opcións. (en inglés)

podomatic.com até 500 Mb (de pago até 2 Gb.), outra moi boa escolla para comezar nisto.

Blogaliza, o servizo galego de blogues baseado en Wordpress, tamén serve para facer podcastes combinado coa extensión PodPress.

castpost.com

poderato.com, sitio mexicano, antes chamado espapod.com. De balde até 100 Mb, para ter máis hospedaxe é preciso contactar por correo-e para saber as condicións.

gcast.com

evoca.com (seica permite gravar co Skype até 60 minutos de balde, máis tempo hai que pagar).

mypodcast, pois de momento parece de balde, aínda que che meten propaganda no comezo do audio.

Odeo.com, xa non ofrece hospedaxe.

de pago:

lidsyn.com

shockpod.com

Agora non digades que tedes preguiza. ;)

Eís unha listaxe de sitios onde atopar música e sons para os teus falangullos con licenzas de copyleft, baixo creative commons, coloriuris, ou similares... aparte dos que fomos topando nas nosas pesquisas persoais, aproveitamos tamén algunha aportación dos amigos de podcastellano.
O movemento de distribución de música baixo este tipo de licenzas é máis grande cada día que pasa, e faise imposíbel abranguelo todo, porén, nestes sitios podedes topar ligazóns a moitos outros sitios máis, e seguir a vosa propia busca.
A nosa intención, con esta listaxe, é, máis ca evitar posibles problemas de dereitos coa SGAE polas músicas que empreguedes nos falangullos, promover a música libre, porque se están a facer cousas moi interesantes fóra das gadoupas cobizosas da industria musical, e porque cumpre escoitar cousas novas que doutro xeito ficarían tristemente agochadas.

netlabels galegos:

alg-a netlabel, netlabel promovido polo colectivo alg-a, experimental e electrónica principalmente.

a regueifa, (se cadra o máis rebulideiro de todos) novas bandas e vellos discos case esquecidos e descoñecidos.

parafuso, especializado en electrónica.

teorema, netlabel morracense especializado en electrónica.

tres catorce, división do netlabel teorema.

de Portugal e Brasil:

enough records, focado en electrónica, IDM, postrock, industrial, noise, glitch, drone e dark, non desbotan outros xéneros que lles enchan o ollo.

lástima, netlabel que di actuar no cenário do rock nacional e internacional na sua expressão mais simplista, mas também na mais alternativa..

merzbau, netlabel que se propõe a editar música que não tem espaço nos circuitos habituais da indústria musical de forma a tentar impulsionar o surgimento de novos nomes e nova música.

phonotactics, novo selo portugués con música electrónica e experimental de distintas partes do mundo.

rasarte, pop e rock.

test tube, netlabel português focado a novos grupos con novos sons, electrónica ou acústico.

tranzmitter, netlabel creado a partir da idea de divulgar produtores de música eletrónica de calidade e que ainda non posúen un selo co que espallar os seus traballos no Brasil ou no exterior.

you are not stealing records, netlabel português promovido pola Stealing Orchestra.

música en castellano:

127.es, proxecto de Enrique Sierra (Radio Futura) no que ademáis de música se distribúen textos, imaxes e software baixo licenzas creative commons. É preciso estar rexistrado para poder descargar.

argentina folclore, música folclórica arxentina.

date a conocer, sitio para dar a coñecer grupos e solistas españois.

depop.es, plataforma independiente para promoción de artistas españois a favor da cultura libre.

internerds.org, disqueira peruana on-line e off-line nacida para perder (cartos).

holyrook, netlabel arxentino.

mamushka dogs records, novo selo arxentino especializado no rock psicodélico.

musicalibre.info, idem e tal...

musikasi, unha especie de chuza para cancións baixo copyleft, pódense votar e descargar. Organizado por categorías.

offaudio.com, portal e netlabel, sobre a música techno en España.

poni republic, netlabel mexicano.

trastienda, net-label radicado en Salamanca e dedicado ao pop, rock, folk e a electrónica en todas as variábeis.

zona indie, blog dedicado á escea musical independente de Bos Aires, onde teñen unha compilación de discos arxentinos publicados baixo licenzas cc.

de Cataluña:

musicalliure.net, portal de difusión de música libre en catalán activo desde outubro do 2006.

error! lo-fi recordings, xeitoso netlabel catalán cun ano de vida, que agora se lanza a publicar tamén en soporte CD. No catálogo teñen, ademais, xente de Polonia, Alemaña e Francia. Especializados en música experimental e folk.

outros sitios:

alpine chic, selo suizo que se confesa amante da música electrónica underground.

another records, netlabel franco-belga.

archive.org, a caixa de audio do arquivo da rede.

artistserver.com, cancións soltas, ollo! algunhas con copyright.

bitlab records, netlabel húngaro especializado en sons electrónicos.

blocSonic, portal onde lanzan escolmas de música copyleft unha vez por mes, aforrándoche o traballo de andar ti a buscar pola rede adiante. Con cada lanzamento engaden un libriño dunhas 30 páxinas (mesmo máis) con abondosa información sobre os músicos e temas recollidos, e os netlabels até. Un traballo de campo impresionante, unha enciclopedia case.

Bump Foot, netlabel xaponés expecializado en música electrónica, mas non só.

cchits, sitio semellante a musikasi, pero en inglés.

creative commons audio, a caixa para o audio baixo esa licenza.

copydown, sitio italiano promotor da cultura libre que autoproduce música e ten tamén un podcast.

dharma sound, netlabel italiano que traballa desde setembro do 2005. Ten sindicación dos lanzamentos para que poidas estar ao día das novidades.

dogmazic, portal francés para distribución e promoción de músicos. Ten un curioso sistema para baixar as cancións, e é que traballa como un podcast: cada artista (e cada álbum) ten un feed propio, de xeito que podes subscribirte, e de cada vez que se suben novas cancións dese autor automaticamente se descargan ao teu computador a través do teu agregador habitual.

dying giraffe, netlabel holandés de música pop-rock onde ademais de poder descargar as cancións tamén podes mercar os cedés orixinais por un prezo ben económico.

fading ways, portal musical con cabeza e pés no Canadá, no Reino Unido e na Finlandia (rock, pop, folk e punk).

id.eology, netlabel da Alemaña.

IODA, precisas rexistrarte coma podcasteiro, e despois de eles comprobar que o es, podes empregar a música en promoción (tes que engadir os enlaces ás cancións en troco).

jahtari, netlabel alemán centrado no dub.

jamendo, grande almacén de música libre (a meirande parte en francés).

magnatune.com, precisas rexistrarte como podcasteiro.

pod music street, (en xaponés).

podsafe audio, sitio estadounidense de música para podcasteiros, onde tamén se poden mercar os álbumes.

serein, netlabel británico especializado en música electrónica.

sunday in spring, netlabel belga.

thinner, netlabel de música electrónica con base en Frankfurt activo xa desde o 1998, no que podes estar ao día dos novos lanzamentos por sindicación rss. levan xa publicado un cento de álbumes.

travelling music, netlabel francés.

unique records, netlabel belga.

máis ligazóns interesantes:

freesound, proxecto colaborativo onde subir e baixar arquivos e efectos de son con licenzas libres.

netlabels.org, portal que tenta recoller todos os netlabeles de música libre tirando basicamente de archive.org e de scene.org, cunha wiki na que ordean por categorías e poñen ao día dos últimos selos e lanzamentos.

Open Sonics, é o proxecto persoal do enxeñeiro de son David Holmes, que aproveitando os feeds de distintos sitios recolle as novidades que se dan no mundo da música libre, e, adaptando a ferramenta de Google para crear buscadores personalizados, creou un para localizar estas músicas, o Open Music Search engine.

We share music, interesante portal, aínda en beta, onde os netlabels poden promover os seus lanzamentos e que permite tamén a descarga. Podes buscar a música por etiquetas e dispón dun rss para os últimos lanzamentos. De momento case todo é música electrónica de distintos estilos.

Seguimos pesquisando... ;)